Paul Letta Ta Philemon

A, Paul, wa een de jailhouse fa sake ob Jedus Christ, an we broda Timothy, da write ya, Philemon, we deah Christian broda wa da hep we een de wok. A da write too ta ya, Apphia, we sista, an ta Archippus, wa da wok long wid we een de fight. An A da write ta de bredren wa da meet dey een ya house. We da pray dat God we Fada an we Lawd Jedus Christ bless oona an gii oona peace een oona haat.

All de time wen A da pray fa ya, A da tell me God tankya fa ya. Cause A yeh say ya lob all God people an ya da trus een de Lawd Jedus. A da pray dat de fait dat oona hab een de Lawd Jedus gwine hep oda people fa ondastan mo an mo bout de blessin dat God da gii we, wen we one een Christ. Wen A yah how ya lob God people, A been full op wid joy an A tek courage fa true. Cause me Christian broda, ya done mek God people haat glad.

So den, eben dough A got de tority fa chaage ya fa do wa ya oughta do, cause A Christ postle, stillyet, cause ob ya lob, A ain gwine do dat. A jes da aks ya, eben dough A Paul done ole an now A een de jailhouse fa sake ob de wok dat A beena do fa Jedus Christ. A da aks ya fa sake ob Onesimus, wa God done mek me own chile een Christ. Cause wiles A been een de jailhouse yah, A bring um fa trus een Christ. Onesimus ain been no hep ta ya, bot now e able fa hep ya, an kin hep me too. A da sen um back ta ya. A lob um sommuch dat e jes like me haat da gwine wid um. A been wahn fa keep um wid me yah fa hep me now wen ya ain wid me, wiles A een de jailhouse fa sake ob de Godd Nyews ob God. Bot A ain keep um wid me yah, cause A ain know ef ya been fa gree fa um fa stay wid me. A wahn ya fa hep me jes ef ya wahn fa hep me. Maybe God leh Onesimus lef ya fa leetle wile, so dat ya kin hab um back faeba. An e ain gwine come back ta ya jes like a slabe no mo. E mo den dat now. E ya deah Christian broda wa da come back ta ya. A lob um fa true, bot fa sho, ya gwine lob um mo den me now. Cause e da wok fa ya, an mo den dat, e ya deah broda een de Lawd. So den, since ya know e one een Christ, da wok togeda, ya oughta gii Onesimus haaty welcome, jes like ya been ga gii me haaty welcome. If e done do ya wrong or ef e owe ya sompin, chaage me fa dat. A Paul da write dis yah wid me own han. A gwine pay ya back wasoneba Onesimus da owe ya. A ain gwine taak bout de debt dat ya owe me. Ya owe me eben ya own sef. Yeah, me broda, do me dis fabor, fa sake ob we Lawd. A ya Christian broda. Mek me haat glad. Wiles A da write ya dis, A sho dat ya gwine do wa A aks ya fa do. A know ya gwine do eben mo den wa A aks ya fa do. One oda ting, A wahn ya fa git a room ready fa me. A da look fowaad, cause ob de pray dat oona all da pray ta God fa me, dat e gwine git me outta dis jailhouse so dat A gwine be able fa come ta oona gin.

Epaphras, wa longside me een de jailhouse yah fa sake ob Jedus Christ, e tell oona hey. Mark, Aristarchus, Demas an Luke, wa all da wok togeda longside me, dey tell oona hey too. A pray dat de Lawd Jedus Christ gwine bless all ob oona.

Taken from the Gullah New Testament (De Nyew Testament)

Advertisements

4 Responses

  1. Jedus s da way broda.

  2. thats tight. a speaker from africa read that in chapel a couple weeks back. good stuff.

  3. I would much rather HEAR it than have to read it… interesting though

  4. yeah… me too.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: